日放天燈  入黑夜蒲

廖子妤趙善恆台北一吻定情

(先機網)原創劇《向西聞記》在 NETFLIX 上架一星期,已火速打入熱播區,好評持續上升。明日 ( 5月10日 ) ,hmvod 免費睇將播出由趙善恆 ( 恆仔@ToNick ) 和廖子妤合演的單元《台北的港男港女》上集,當中微妙的人物關係,由之前的《食女性地嘉亨灣》發展下去;《台北》講述飾演鹹賤保安員趙永洪的同事恆仔,因為甩拖變成單身狗,獨自走去台灣溝台妹,結果在當地夜場撻着港女廖子妤 ( Fish ),而她又誤會恆仔係台仔,兩人由錯摸開始變成一段浪漫之旅。
 
這個單元上下兩集全於台北取景,愛的故事上集 sweet 到不行,坐捷運、放天燈、遊老街,恆仔和 Fish 更在情人橋一吻定情,但搞笑地,恆仔比子妤緊張得多,對此他笑說:「自己有啲緊張嘅,好彩 Fish 係好有經驗嘅演員,經過溝通之後,拍攝時都好順利。」
 
相對 Fish 就比較淡定,「拍錫戲時同恆仔識咗冇耐,唔係好熟,反而太熟先尷尬,會有好多ng,同恆仔唔會,唔熟唔敢太過放肆玩,令到大家 ng 就唔好啦,但係緊張、驚我有嘅,其實恆仔比我更加緊張,雖然佢入行耐,但可能佢同女演員拍親密戲份比我少好多,佢拍攝之前走過嚟問話不如傾一傾,我就知道佢比我更緊張,咁我就知我可以掌控成件事,我話放心啦,交俾我。」
 
Fish 和恆仔都覺得上集《台北》拍出來的感覺浪漫滿瀉,但結局就出人意表,徹底扭轉,所以當他們拍完外景返港之後,五味架的各式味道仍縈繞恆仔腦中,觸發了他創作《我們是無法說明的季節》一曲,這首歌當然亦成為劇集主題曲,並 featuring 首次唱歌的 Fish,恆仔說:「呢首歌係拍完之後,個人都仲係角色入面,最大問題係返香港之後仲諗點解自己嘅收場係咁,個腦甩唔到、諗唔通,係靠音樂去宣洩,用鋼琴彈咗一段 melody,導演聽完之後覺得好好,話不如做隻完整嘅歌啦。」恆仔覺得 Fish 唱得好,大家要給她更多鼓勵,但 Fish 就騰騰震,特別係曾試過現場演唱,真係嚇到冇命,她笑說:「我真係好驚!我好鍾意唱歌,但我對自己嘅歌聲同埋現場唱嘅能力好有限,我個人太易緊張,緊張過頭就有好多奇怪情況發生,一係呆咗一係過度興奮,控制唔到自己,需要累積多啲經驗,但好多謝恆仔無論拍攝過程或者錄音都俾好多意見我。」

 

上一條下一條