爆肚生仔論熱炒

網民勁buy林雪喜感粗口

(先機網)一對夫婦,兩個仔加兩個新抱,一齊迫住豆膶公屋,星斗市民的蝸居生活確係有苦自知。最擅長寫貼地故仔的向西村上春樹筆下著作、現已上架的 hmvod 原創劇《向西聞記》,內裏的 9 個單元各具本土風味,當中的單元《碌架床》正係描述一家六口在兩房的三百呎公屋困獸鬥,兩兄弟同老婆兩 pair 人爭房爭廁乜都爭,老竇老母自然加把口混戰,日日家嘈屋閉,雞犬不寧。
 
其中一幕,講述大佬鄧健泓同細佬王宗堯為爭房炒大鑊,老竇林雪睇到眼火爆,爆粗狂剷,兼且一鎚定音,「邊X個生個孫俾我,間屋就俾邊個!」兩兄弟一聽完即刻各自捉住老婆石詠莉及蔡明思 ( Jessica@SuperGirls ) 入房「做嘢」,進行造人大計。餘怒未消的林雪就繼續爆粗媽叉,但又反對兩個仔的「白日行動」,「日頭唔好做呀,日頭中嗰啲,生出嚟嗰啲黑色架,你兩個咁白淨,你問吓你老母吖,我哋晚晚..嘻嘻..」
 
這段長約兩分鐘的片段自日前曝光後,一日 hit rate 已過50萬,爆 like 爆 share,網民comments 群情洶湧,除了狂 tag 朋友睇戲外,近乎全部都讚林雪講粗口好好笑,夠晒港式地道、自然奔放、喜感瀰漫,「日頭中嗰啲,生出嚟嗰啲黑色架」更成金句,令網民笑到肚痛。
 
林雪的黑白BB生仔論,原來係拍戲當日即場爆肚,因為林雪向來係「劇本就喺個腦」,消化了角色再自然吐納,效果相當生活,他說:「做戲就係做緊生活,我好少家嘈屋閉,但一家人點都有啲拗撬時候,就係因為係一家人,愛之深責之切嘛。
 
林雪的地道粗口會隨住《向西聞記》在 4 月 30 日起飛,去到 NETFLIX 走遍全球,雖則網民 buy 他爆粗,但林雪亦有其看法:「其實我講粗口唔代表認同講粗口係一件好事,相反好想話畀後生仔女聽,唔好講咁多粗口,因為粗口有時會傷害人,不過粗口始終係我哋一種文化,希望大家當睇喜劇,睇吓笑吓就算。」
上一條下一條