梁漢文蘇永康翻轉金光綜藝館

(先機網報道)由梁漢文、 蘇永康組合而成的《SO MAN SHOW演唱會2018》,前晚在澳門威尼斯人金光綜藝館舉行,今次他們決定起雙飛,歌酬由二人袋袋平安,在演唱會上他們施展渾身解數,幾度落台握手兼與大玩selfie,令觀眾鋒湧衝出台前炒熱氣氛!

《SO MAN SHOW演唱會2018》雖然是開三面台,但梁漢文(Edmond)和蘇永康(阿公)不時與觀眾大搞互動,實行零距離接觸,握手位不絕,因為他們幾度走落台及到兩側觀眾席握手又selfie任影唔嬲,令粉絲們衝上前爭位自拍,Edmond更不惜企高在圍欄上邊唱邊與觀眾打招呼,保安人員見狀即上前攬實他雙腳,他笑言未試過自己個屁股坐在別人的膊頭上!他們在台上除了合唱有大部份時間是個人獨唱,Edmond笑說:「今晚幾爽喎,冇咗嗰兩隻嘢(許志安、張衞健),平時有Big 4係就係好熱鬧,不過歌酬要除4,但係今次除2喎!好開心喎!」蘇永康與觀眾互動時,即興將自己隻戒指送給一對長者夫婦,並著老伯伯為太太戴上,接著阿公開心大叫「禮成!」另外,阿公又邀請粉絲上台合唱,卻原來他點中專程來捧場的歌手陳逸璇(Jolie) ,阿公搞笑說:「好少見啲粉絲咁靚女,唔理佢唱得好唔好聽,最緊要好睇咗先。」結果二人合唱一曲「從不喜歡孤單一個」,到尾聲時Edmond和阿公以譚詠麟的經典勁歌串燒作結束演唱會!

對於今次他們二人組合舉行演唱會,Edmond笑說:「今次在這個場地演出有些感觸,因為以前有Big 4及男人幫組合一齊演出,但是現在只有他和阿公難免有點唏噓,不過當想起歌酬是除二,就當堂醒晒,好正!」阿公亦贊成以後二人要多多合作,至於Big 4及男人幫個兩組合何時再復合?阿公表示,一切隨緣!另外阿公的太太及兒子也有到來,不過可愛的囝囝卻冇面畀,聽聽下歌睡魔急call,阿公笑說:「囝囝去年有跟佢去新加坡演唱會,可能佢當時好細個,所以太嘈唔可以出台前聽,今次佢有出過台邊一陣,希望下次再唱佢可以坐係台下睇爸爸唱歌,其實囝囝好鐘意聽啲節拍強勁嘅歌,Edmond喺台前唱歌時囝囝仲郁來郁去,點知我換完衫出場個仔就瞓咗,所以尾part唱譚詠麟嘅串燒快歌,想叫醒個仔起身!」

 

上一條下一條