林雪親自下廚親手煮獨門招牌菜「雪式紅燒肉」請小 Celine 享用。

一大一細街市買賀年餸

林雪Celine煮獨門紅燒肉

 
(先機網報道)今日係狗年大年初一,家家戶戶都鍾意聚首一堂,食飯、拜年,一家大細都咁開心。同一經理人公司的林雪同譚芷昀 ( Celine ),作為公司家族磅數最重同最輕、年紀最大同最細嘅成員,呢對咁有趣嘅配搭,早兩日就一齊去街市買賀年餸,並由林雪親自落廚,親手煮獨門招牌菜「雪式紅燒肉」請小 Celine 享用。
 
林雪知道 Celine 鍾意食豬肉,所以特別整紅燒肉這味拿手菜式,紅紅聲好意頭又好味。聽到菜名已經流口水的 Celine,當日就由林雪帶領去荔灣街市買餸,林雪買豬肉時,Celine 仲搞笑地同檔主講價,結果 bingo收平一百蚊,真利害。之後 Celine 去菜檔買蒜頭京蔥等配料,唔知買得幾咁開心,好似大人濕平般,一袋二袋滿載而歸。
 
重頭戲當然係林雪廚房,估唔到林雪下廚非常了得,火喉到、調味準確,其獨門秘方係蒜蔥炮製的醬汁,令整道菜色香味俱全。Celine 一啖紅燒肉落肚就不得了,成碗白飯被吃到碗底朝天,Celine 說:「我有試過同媽咪去街市買餸,會幫媽咪買好多嘢。呢個紅燒肉我買咗豬肉、蔥、薑同蒜頭,原本買咗三百幾,後尾轉咗二百四十蚊。紅燒肉好好味呀,多謝晒,good job,林雪哥哥。」
 
「雪式紅燒肉」成為林雪招牌菜,源來有故仔,林雪說:「我細個好鍾意食肉,見到隔離整紅燒肉就流口水,成日俾屋企人話我為食,我自細有個願望,等我大個咗搵到食,一定日日煮紅燒肉。到我大個搵咗第一嚿錢就買咗嚿豬肉,返去研究紅燒肉,我搵第一次錢係15歲,今年我 50 幾歲,你諗吓我做紅燒肉做咗幾耐,所以我呢個紅燒肉係幾拿手。」呢道菜,係好味到連羅家英都叫好,林雪表示:「喺國內拍戲天寒地凍,有時飯盒嚟咗又未必即刻有得食,所以我有喺現場煮好多紅燒肉俾大家食,一煮就煮幾十斤。我試過一次,家英哥佢有糖尿嘅,從來唔食肉同埋唔食甜嘢,但佢食完之後返轉頭問我攞多幾嚿,所以第日邊個導演搵我拍戲,我煮紅燒肉你食好冇?」

 

上一條下一條