Mr.Chan 人生中究竟激嬲幾多個女人,可能數之不盡。

Chan女郎大堆頭數子華神

謝安琪李婉華驚喜登場

(先機網報道)黃子華在狗年賀歲猛片《棟篤特工》內飾演多情特工「Mr.Chan」,因為執行任務而向 madam 佘詩曼悔婚,自此阿佘憎到佢入骨入血,窮一生玩謝 Mr.Chan。不過 Mr.Chan 堅強、敏捷、智勇雙全,確實令唔少女死喺佢手上,對佢又愛又恨。 
Mr.Chan 人生中究竟激嬲幾多個女人,可能數之不盡,一眾「Chan女郎」包括黑人白人阿嬋大媽,加埋16位女星齊齊數爆 Mr.Chan!16位女星中,有參演《棟》片嘅佘詩曼、蔡少芬、吳君如、蘇麗珊、鄭欣宜、苑瓊丹;但估唔到出現嘅「Chan女郎」更多:有周秀娜、胡杏兒、陳慧珊、廖碧兒、陳法蓉、雨僑、僅得10歲嘅 Celine (譚芷昀) 同 4 歲妹妹 Dion;更估唔到嘅係有兩位天后神奇出場,就係莫文蔚及剛剛產後復出的謝安琪。終極更更更估唔到嘅係 ─ 竟然有李婉華! 
早年已移民加國的婉華,今次為撐子華新片而激罕出鏡,片中佢仲嚴重警告子神:「喂!你再唔出現,我報警架!」
其實今次電影公司炮製這條「Chan女郎」數爆 Mr.Chan 宣傳片,被邀請拍攝的女星都一口答應,各自諗盡方法去表達對 Mr.Chan 的愛與恨;所以、證明:Mr.Chan 真係好有女人緣。
上一條下一條