《反黑》憑單日之 5673 萬點擊登上全國網劇 No.1。

《反黑》單日點擊登全國榜首
吳孟達出場贏《使徒2》三倍

(先機網報道)熱爆4K網劇《反黑》自推出以來備受網民追捧,短短九日在中港兩地點擊率已衝破3.6億!截到今日(10月2日)下午五時,《反黑》憑單日之 5673 萬點擊登上全國網劇 No.1,打贏之前一直佔據榜首、由國內影帝潘粵明主演的網劇《白夜追凶》(3904 萬點擊),至於《使徒行者2》就跌至第四位 (1668 萬點擊)。《反黑》不止點擊贏《使徒2》三倍,最難得係打贏《白夜追凶》,確實令港劇吐氣揚眉。
《反黑》繼張建聲飾演的「招積」吸引大批網民捧場外,近兩集就輪到老戲骨吳孟達出場,他扮演過氣大佬「豬油哥」,而劇中飾演「小黑」的柯有倫就對達哥這位老叔父處處照顧,描述了一段兩代江湖情。達哥出場當然令網民超like,他提起柯有倫就笑說:「我同佢爸爸(柯受良)係同輩,拍《反黑》時仲有秦沛個仔(姜文杰),佢演反派,姜文杰同柯有倫都非常敦厚,好有修養,對我非常尊重;同埋Paul哥(秦沛)亦有嚟探班,會提起小黑哥當年點點滴滴,有好多甚至連佢個仔(柯有倫)都未必真正了解,總之拍《反黑》好開心,大家又係老朋友,包括惠敏哥(陳惠敏),我哋大家年紀大咗,講嘢都係想當年,雖然長氣啲,但講番好有趣。
拍《反黑》令達哥可以與老友聚舊,亦令他想起已離世的柯受良:「黑哥係一個好講義氣嘅人,當年佢喺電影圈講義氣出晒名,視錢財如糞土,隨隨便便一擲千金,從來唔會肉赤;佢個仔同佢性格好唔同,柯有倫好穩重,唔同爸爸有江湖味,希望大家都支持《反黑》。」
此外,張建聲對於劇集大受中港兩地觀眾及網民歡迎表示高興:「兩地文化有少少差異,但佢哋都咁支持港劇,呢個我好感恩。佢哋好鍾意套劇,好鍾意『招積』呢個角色,仲問我係咪臥底;YouTube方面(被停播一事),我好感謝網民,已經處理好,經過檢查之後YouTube知道冇問題,最緊要係做好自己。」
事實上,《反黑》的官方YouTube頻道日前遭惡意舉報而短暫停播,令劇集一度要在官方facebook專頁播放,幸好經過溝通後已獲YouTube解封,更成功轉危為機;事件發生後,不少網民在《反黑》facebook專頁留言力撐,「好好睇,加油」、「個劇做得好好,演員又落力演出,加油,支持,剛睇完第十集」、「好戲自然吸引觀衆欣賞!」、「其實我好多年無睇港劇,你地呢套反黑真係令我咁多年嚟第一次有興趣去追港劇,重要係追到唔想停同好期待你哋盡快出下一集!加油呀!」、「優質的港劇,超棒」。

上一條下一條