Justin飾演社團大反派「招積」,他為演這個角色,要漂髮、漂眉,亦因為拍攝時間長及太投入角色。

踎監被雞姦斷手腳

張建聲遭吳岱融打爆缸

(先機網報道)張建聲 (Justin) 前後花足8個月時間做前期籌備及參演之超級網劇《反黑》,終於在明日(9月22日)正式在優酷播映,至於香港亦會緊接播出。今次Justin飾演社團大反派「招積」,他為演這個角色,要漂髮、漂眉,亦因為拍攝時間長及太投入角色,Justin更一度求助精神科醫生,付出相當大。 
Justin在劇集初期扮演社團人物陳小春的手下,他一直很崇拜小春,豈料對方原來係警方臥底,搞到Justin被誤為二五仔兼坐監,「呢個角色係大奸角,又係個極度悲劇嘅人物,因為佢行咗一條唔好嘅路,佢俾警察拉咗之後坐咗幾年監,係監倉入面受嘅折磨,俾人雞姦、俾人恰、打斷手打斷腳,令佢覺得呢個世界要以惡鬥惡,目標係出返嚟搵番陳鳳翔 (陳小春) 報仇。」

 

在宣傳片內,有一幕係Justin被飾演黑幫老大的吳岱融在屋內拎起碌壘球棍追打,兜頭扑到爆缸又掃玻璃樽,掃到Justin匿入枱底,之後成張枱反轉壓落Justin身上,暴力到令人戥Justin牙煙。提起拍這場戲,Justin都好深印象,他說:「因為岱融哥以為我係臥底,佢想起條針出嚟,但原來係陳小春,由呢度掀起成件事開端,亦係招積嘅誕生。拍打呢場都辛苦,好多時冇借位,要帶pad被岱融哥打心口、打背脊、打手打腳,張枱跌落嚟嗰場,有幾吓唔啱位,肋骨係硬食晒,嗰張枱要兩個人先抬得起,稍有依郁真係肋骨都碎,但效果好好。」當日Justin在周圍佈滿玻璃碎的地下躝嚟躝去過了一日,真係唔好過,他笑說:「我形容為好似打狗咁,當時拍攝係成個氛圍好恐怖,嗰枝壘球棍係真唔係道具,打落枱櫈度嘭嘭聲,恐怖感就出嚟,嗰啲喊嘅哀號由心發出嚟,第一係代入戲入面,第二係真係驚打到唔知點算。」
上一條下一條