雷晴雯Winnie日前出席於文化中心舉行的「香港音樂兒童基金會」相片展覽。

雷晴雯籲多關愛

助尋更廣闊世界

(先機網報道)藝人雷晴雯Winnie日前出席於文化中心舉行的「香港音樂兒童基金會」相片展覽,看著照片中兒童專注地玩著樂器的照片,Winnie坦言身同感受,感觸良多:「細個時屋企好窮,住過木屋區,亦住過只得100呎嘅板間房,可以話衣食住行都成問題,衫同玩具全部都係用人哋唔要嘅二手嘢,更莫講話出去玩。但偏偏我好細個已經鍾意跳舞,當年媽子為咗唔想因為家貧而要令我整日困喺屋企對住四道牆,所以死慳死抵,情願食鹽油撈白飯,買鯪魚骨做餸都要供我去學芭蕾舞,而又的確,當年最開心就係期待每個星期六嘅芭蕾舞堂。」

同樣是基層出身的Winnie感慨表示,細個根本無諗過自己當年嘅芭蕾舞學費背後原來係嚟得咁辛酸,所以好明白基層兒童嘅感受。「每個人都有其有待發掘及發展嘅天賦,基層兒童都應該擁有發展才華嘅機會。出生於基生佢哋無得揀,但有能力嘅人可以給予佢地幫助、鼓勵同支持。俾佢地感受到更多嘅溫情同接觸更廣闊嘅世界。」

過去十多年Winnie曾籌辦及參與過無數慈善活動,但在眾多慈善活動中,令她最觸動及印象最深刻的,是來自一次由她負責的基層兒童曲奇製作活動:「當時嘅老闆成家人都好有愛心,每個月都會為基層及不同身心障礙家庭喺自己經營嘅餐廳舉辦不同類型愛心活動。最記得當日我同埋其他同事一齊教一班來自基層家庭嘅小朋友整曲奇餅,整嘅過程當然笑料百出,直至啲曲奇焗好拎出嚟放返喺佢哋面前時,有位七八歲左右嘅小妹妹望住佢自己整嘅曲奇掂都唔敢掂,我過去問佢點解,佢細細聲喺我耳邊,同我講『曲奇餅好貴架!我哋屋企好窮,啲錢要留返俾我同細佬妹返學讀書用,掂過整污糟咗就要賠錢架喇!』我聽完真係打從心底心酸難過出嚟,因為我自己都窮過,所以好明白小妹妹嘅感受。當佢知道真係唔使俾錢,而且仲可以拎返屋企俾細佬妹食,佢當刻臉上嘅笑容同喜悅,特別係佢同我講係佢嘅第一塊曲奇餅時嘅驚喜表情,我永遠都唔會忘記。」

Winnie坦言自己亦是基層一族,但多有多幫,少有少幫,出唔起錢,出力都一樣:「其實只要每個人都願意伸出愛心之手,就可以幫助到更多嘅人,尤其基層嘅小朋友,佢哋更需要社會同大眾嘅愛心同關注,先可以令佢哋有更健康嘅身心靈成長,幫助同帶領佢哋開拓更廣闊嘅視野。」

上一條下一條