效法休魚期停辦港姐

每年到五、六月間，都係選美會招募靚女嘅日子，今日有百幾個女仔到TVB參加港姐面試，睇同事影番嚟嘅相，阿八隨口講咗十二個字，結果編輯都用咗嚟做標題，嗰十二個字係人才凋零、每況愈下、乏善足陳。相信大家都估到今年嘅港姐質素有幾高。

唔好話阿八又係度緬懷往事，點解以往港姐嘅質素會高咁多，其實阿八都曾經深思熟慮諗過，唔通香港真係冇晒靚女。以前話選港姐啲佳麗平均質素差，但每屆點都有一兩個係大熱門標青啲，依家個啲真係池中冇魚蝦自大。

阿八認認真真有個建議俾港姐，橫掂依家亞視都冇咗年頭選亞姐選到年尾，不如效法特區政府嘅「休魚期」，停辦港姐一至兩年，俾啲時間休養生息，俾啲靚女好好準備及裝備自己。

阿八

港姐