謝安琪 昂然歸家去

有一種明星永遠散發着金光璀璨的光芒,有一種明星卻親民樸實而且坦然。謝安琪(Kay)屬於後者,沒有煙花與香檳的新人發佈會,沒有強大的公司支持,憑著對音樂的信念及堅持,在樂壇的十年光景,換來一個裝滿快樂回憶、艱辛淚水的行李篋,昂然歸家。

2005年以平凡的包裝入行,最難忘Kay的淡妝加箍牙造型,當外界不甚看好的女歌手,卻因為一首又一首諷刺時弊和貼近社會的歌曲而被傳媒、網民封為「平民天后」。Kay笑言一切都出乎意料:「以我嘅性格係唔會揀呢份工,10年前忽發其想入行,呢10年建立到一班鍾意我音樂嘅人,鍾意同我一齊工作嘅人,我好幸運,好感恩!」

Kay曾經說:「不知人生能有多少個10年,至少過去10年是精彩的、豐盛的、無悔的。10年回望,豁然開朗。」

Kay在這10所經歷的開心與「難頂」事,累積成為今天的謝安琪,令她的人生帶來價值,同時令她成長,看清世事。

暫別不是逃避

2016年選擇暫別,不是逃避,而是思考未來10年的路如何面對。幾年前,當Kay面對爆肺的健康問題,加上莫須有的負面新聞壓力,曾經有一刻想離開,她說:「身體唔好,又多輿論,但如果嗰刻我離開,好似承受唔到敗走咁!呢種休息唔可以令我真正放鬆,我亦面對唔到自己。我決定堅持,今天我處理到所有嘢,健康漸漸回復軌道,加上完成合約,開完演唱會,連黑膠紀念唱片都出埋,咁樣暫別我先可以享受休息嘅時光。」

有人說Kay在事業高峰離開有點傻,但她卻有自己的一套,有些人追求人氣有多高,獎項有多少,收入有多豐裕,但Kay這10年的事業起跌,反而令她努力追求簡單的家庭生活,Kay說:「我未有計劃幾時重拾工作,我唔擔心休息之後啲人會唔記得我,如果係咪有得佢,我可以搵其他方法、平台去表演,我唔會將音樂同我嘅生活分離,10年前出道時對音樂嗰份單純;10年後或者將來依然。拎得起放得低先最自在。」

做演員人品修練

演唱會及《彊》電視劇成為Kay的暫別作,前者仔仔張瞻為Kay帶來完美回憶,後者老公張繼聰為她帶來無限鼓勵,Kay説:「以前我同老公希望小朋友低調,唔想影響佢平靜嘅生活,依家佢大個,有自己嘅想法,我會全力支持,希望佢感受到媽咪喺工作上嘅意義。」

而Kay第一次擔正電視劇女主角,曾經為負評而唔開心,因為張繼聰的一句說話才得以舒懷,她說:「張繼聰話做演員去到某個程度,就係人品嘅修練,當然我演戲上好新,但憑著真誠嘅做人態度去處理角色,一定會演得好。當然仲要感激白只帶領我去了解角色,同監製陳維冠對我嘅信任。」

昔日Kay的「小小鬥志」,

10年來「沿途活得相當有意義」,

將來「趕快去補,趁還未老」,

期望他日「問我初衷,鏗鏘的答,不吞吐」

(取材《山林道》)

 

Text:李敏儀

上一條下一條