泰林清盤
黃金舖位丟空六年

(先機網報道)老牌本地電器商泰林,08年結業到依家,係佐敦彌敦道嘅旗艦店一直丟空,地產業人士估計,8400萬租金收入,就咁白白流失。點解會咁大徙呢?係附近擺檔賣報紙嘅老闆娘都覺得好奇,「唔清楚點解(一直空置)!」
但有街坊盛傳係業主、泰林前老闆林作禮,睇唔上呢D「濕碎」嘅租金收入。隔離舖的業主說,「嘩!好多錢,成百幾萬,一個月喎,你話佢幾有錢?一個月租百幾萬蚊,咁就由佢丟空左咁耐。」他又話,呢區的商舖好搶手,出租率高,舖位好值錢,「呢楝樓(泰林舖位)成六、七億元,有錢的人我真係頂佢唔順!」
獨家為該舖位招租的美聯工商舖行政總裁黃漢成透露,早前由於泰林清盤程序未完成,阻礙出租出售,「因為破產管理人有部份股權,有D技術問題,搞到租唔到買唔到。」
但市場人士指出,清盤手續未完成只係「官方答案」,真正原因是業主「唔等錢使」,唔到價,寧願丟空都唔「賤租」。據悉,花旗銀行、同仁堂及連鎖化妝店曾經開價約一百萬元承租,同業主要求嘅百五萬差一截,最終傾唔搞數。佢話呢個舖位好靚,由兩鋪打通而成近萬呎,門面闊度超過百二十呎,好多公司想租來做旗艦店,但業主太心雄。而且曾經有人出價七億元想買斷,傾了好耐,最後都賣唔成。依家零售市場萎縮,商舖交投平靜,這間舖可能要再空置一段時間。
由六十二年歷史O嘅泰林電器,全盛時期全港有13間分店。08年遇到金融海嘯,資金周轉困難,果年10月17日全線結業,260名員工飯碗爛咗。臨時清盤人安排兩日半價開倉行動,吸引大批市民執平貨,最後套現470萬元,還清欠薪。
倒閉後,泰林老闆林作禮好少露面。有電器業人士表示,林作禮近年到內地做生意,對香港房產懶懶閒。土地註冊處的資料亦顯示,清盤第二年他更用一千四百萬元,購入兩個住宅單位。

上一條下一條